சக்தி கொடு! - 6 சிவராம் ஜெகதீசன்

ஆரோக்கிய வாழ்வுக்கான வைட்டமின்களும் மினரல்களும்
********************************

வைட்டமின்களும் மினரல்களும் உடலுக்கு அத்தியாவசியமான சத்துகள் என்பதுடன் நமது உடலில் பெரும்பாலான செயல்களுக்குக் காரணமாகின்றன. எனவே, அவற்றைத் தேவையான அளவு எடுக்க வேண்டும். குறைவான வைட்டமின்களும் மினரல்களும் எவ்வாறு பிரச்னைக்கு வழி வகுக்குமோ அதேபோல் அதிகமாக எடுப்பதும் ஆரோக்கியத்தைக் குலைக்கும்.

எது தேவையான அளவு?

அமெரிக்க உணவுக்கழகம் இதற்காக ஒவ்வொரு வைட்டமின் மற்றும் மினரலுக்கும் Recommended Dietary Allowance - RDA என்று ஒரு அளவைச் சொல்லியிருக்கிறது. இந்த அளவுகள் ஒரு நாளின் தேவைக்கேற்ற அளவு. ஆனால் சில காரணங்களுக்காக அதிகமாக எடுக்க வேண்டியது வரும். அதிலும் தவறில்லை. அளவுக்கதிகமான அளவு என்பது, உடலில் குறிப்பிட்ட வைட்டமின் சப்ளிமெண்டுகளால் சேரும் நச்சுத் தன்மையைப் பொறுத்ததே. இதனால் உடல் ரீதியான பாதிப்பு ஏற்படும்போது குறைக்கவோ நிறுத்தவோ செய்யலாம்.

மைக்ரோ நியூட்ரியண்டுகள் என்று சொல்லப்படும் வைட்டமின்களும் மினரல்களும் உங்களுடைய உடலுக்கு மிகக் குறைந்த அளவே தேவைப்படும். அந்த நுண்ணிய அளவு கூட உடலுக்குக் கிடைக்காத நிலையை வைட்டமின் குறைபாடு என்று சொல்கிறோம்.

உதாரணத்துக்கு வைட்டமின் C குறைபாடு ஸ்கர்வி நோயைக் கொடுக்கும், வைட்டமின் A குறைபாடு பார்வைக் கோளாறுகளைக் கொடுக்கும், வைட்டமின் D குறைபாடு ரிக்கெட்ஸ் எனப்படும் எலும்புகள் பலமிழக்கும் நோயைக் கொடுக்கும்.

போலவே வைட்டமின்கள் மற்றும் மினரல்களின் காம்பினேஷன் உடலுக்கு அதிக பட்ச ஆரோக்கியத்தைக் கொடுக்கும். உதாரணத்துக்கு கால்சியம், மக்னீசியம், பாஸ்பரஸ், வைட்டமின் D, வைட்டமின் K அனைத்தும் சேர்ந்து வலிமையான எலும்புகளைக் கொடுக்கும். கர்ப்பிணிப் பெண்கள் போதுமான அளவு ஃபோலிக் ஆசிட் உள்ள உணவுகளை எடுப்பதும் சப்ளிமெண்டுகள் எடுப்பதும் வயிற்றில் வளரும் குழந்தைக்கு மூளை மற்றும் தண்டுவட சம்பந்தப்பட்ட குறைபாடுகள் இல்லாமல் காக்கும். பற்களுக்கு நல்ல பாதுகாப்பாக ஃபுளோரைட் இருக்கும். அதனால் தான் நீங்கள் ஃபுளோரைட் சேர்க்கப்பட்ட டூத் பேஸ்டுகள் என்ற விளம்பரத்தைப் பார்க்கலாம்.

உங்கள் உடம்பில் வைட்டமின்கள் குறைவாக இருக்கிறதா, அதிகமாக இருக்கிறதா என்பதை எப்படிக் கண்டு பிடிப்பது?

சில வகையான ரத்தப் பரிசோதனைகள் உடலில் இருக்கும் வைட்டமின்களின் அளவைச் சொல்லிவிடும். அதை அடிப்படையாக வைத்து உணவின் மூலமோ அல்லது வைட்டமின் சப்ளிமெண்டுகள் மூலமோ சரி செய்யலாம். பரிசோதனைகளை விடச் சிறந்தது உங்கள் உடம்பில் ஏற்படும் அறிகுறிகள்.

உதாரணமாக உங்களுக்குக் கை கால்களில் மரத்துப் போன உணர்வோ அல்லது கிராம்ப்ஸ் என்னும் குறக்களி அடிக்கடிப் பிடித்தாலோ உங்களுக்கு மக்னீசியம் குறைபாடு என்று அறிந்து கொள்ளலாம். உங்கள் மருத்துவர் அனைத்து ரத்தப் பரிசோதனைகளையும் செய்து விட்டு எல்லாப் பரிசோதனைகளும் நார்மல். ஆனாலும் நோயாளிக்கு பசியின்மை, எரிச்சலான மனநிலை, எடையிழப்பு போன்றவை இருக்கிறது. காரணம் தெரியவில்லை என்று கூறி வைட்டமின்களை எழுதிக் கொடுப்பார். உங்களிடம் இது வயதாவதன் காரணமாக வருவது அல்லது ஸ்டிரெஸ் எனப்படும் மன அழுத்தத்தால் வருவது என்று சொல்வார்.

ஒன்றை ஞாபகம் வைத்துக் கொள்ளுங்கள். உங்கள் உடலுக்கு உங்களை விடச் சிறந்த மருத்துவர் உலகில் இல்லை. இது போன்ற நிலைமைதான் ஆரம்பக் கட்ட வைட்டமின் குறைபாடு. இந்த அறிகுறிகள் என்பவை நபருக்கு நபர் வேறுபடும். பொதுவாக, சாதாரண நிலையில் இருந்து எந்த மாற்றம் உடம்பிலோ அல்லது மன நிலையிலோ தெரிந்தாலும் அதை வைட்டமின் மற்றும் மினரல் குறைபாட்டுடன் பொருத்திப் பார்க்க வேண்டும். அல்லது நீரிழிவு போன்ற நோய்கள் அணுகியிருக்கிறதா என்று மருத்துவரிடம் ஆலோசிக்க வேண்டும்.

இது போன்ற ஆரம்பக்கட்ட வைட்டமின் குறைபாடுகளை, ரத்தப் பரிசோதனைகளாலோ அல்லது மருத்துவராலோ கண்டு பிடிக்க முடியாது. இந்த ஆரம்பக் கட்டத்தை மார்ஜினல் அல்லது சப்-கிளினிகல் டெஃபிசியன்சி என்று சொல்வார்கள். உங்கள் உடலில் உள்ள வைட்டமின் மற்றும் மினரல் சேமிப்புகள் கிட்டத்தட்ட மொத்தமாக காலியாகும் வரை இந்தக் குறைபாட்டைக் கண்டு பிடிப்பது சிரமம். ஒவ்வொரு நாளும் உடலில் தோல், செல்கள், திசுக்கள் வளர்ச்சி என்பது நடந்து வளர்சிதை மாற்றம் நடந்து கொண்டே இருக்கிறது. வளர்ச்சிக் குறைபாடோ, ஜீரணக் கோளாறுகளோ, தோலில் ஏற்படும் தடிப்புகள் போன்றவையோ, முடி உதிர்தலோ, நகங்கள் வடிவமிழத்தலோ, அதிக தூக்கம் அல்லது தூக்கமின்மையோ, மலஜலம் கழிப்பதில் பிரச்சினைகளோ, அடிக்கடி சளி பிடித்தலோ, வேலை செய்வதில் சலிப்போ, உடலுறவில் நாட்டமின்மையோ, எரிச்சலான மனநிலையோ இப்படி எந்தப் பிரச்சினைகள் ஏற்பட்டாலும் அதை வைட்டமின் மற்றும் மினரல் குறைபாட்டுடன் தொடர்புபடுத்திப் பார்க்க வேண்டும். இவை ஏற்படும் போது உடலுக்கு தினப்படித் தேவைக்கான வைட்டமின்களும் மினரல்களும் போதுமான அளவில் கிடைக்கப் பெறுவதில்லை. இதனால் உடலில் சத்துகள்-வறுமை ஏற்படுகிறது. ஒவ்வொரு பிரச்சினைக்கும் காரணமான வைட்டமின் மற்றும் மினரல்களையும் பின்வரும் பாகங்களில் பார்க்கலாம்.

இது போக நாம் சாப்பிடும் ஆண்டி பயாடிக்குகள் போன்ற மருந்துகளும் உடலில் உள்ள வைட்டமின் மற்றும் மினரல் சேமிப்பைக் காலி செய்கின்றன. மேலும் ஆல்கஹால் கிட்டத்தட்ட உடலின் அத்தனை சத்துகள் சேமிப்பையும் காலி செய்கிறது. அத்துடன் இந்த சத்துகள் உடலால் உறிஞ்சப் படுவதையும் ஆல்கஹால் தடுத்து விடுகிறது. நீங்கள் எத்தனை வைட்டமின் மாத்திரைகள் எடுத்தாலும் ஆல்கஹால் அருந்தினால், எடுக்கும் வைட்டமின்களால் எந்த உபயோகமும் இல்லை.

வைட்டமின் C, B1 மற்றும் B6 குறைபாடுகள் Behavioral Problems எனப்படும் நடத்தைக் குறைபாடுகளை உருவாக்கும். எப்போதும் கோபமாகவே இருத்தல், முரட்டுத்தனமாக நடந்து கொள்ளுதல் போன்றவை ஏற்படும். எடுக்கும் உணவில் இருக்கும் சத்துக் குறைபாட்டாலோ, உடலால் சத்துகளை போதுமான அளவு கிரகிக்க முடியாமல் போனாலோ, இந்த வைட்டமின் குறைபாடு ஏற்படத் துவங்கும். எந்த விதமான அறிகுறியுமே இல்லாமல் கொஞ்சம் கொஞ்சமாக வைட்டமின் மற்றும் மினரல் சேமிப்புகள் உடலில் இருந்து காலியாகத் தொடங்கும். மிக அத்தியாவசியமான வைட்டமின்கள் இல்லாத நிலையில், உண்ட உணவை சக்தியாக மாற்றும் என்சைம்கள் அதன் வேலையைச் செய்யாமல் உடையத் தொடங்கும். இந்த நிலையில் உடல்,நோய்க்கான அறிகுறிகளைக் காட்டத் தொடங்கும். முதியவர்களுக்கு இந்தப் பிரச்சினை இன்னும் அதிகமாக இருக்கும்.

உடலில் ஏற்படும் காயங்கள் ஆறுவதற்கு வைட்டமின் A மற்றும் C முக்கியமானது. முதியவர்களுக்கு ஏற்படும் குழம்பிய மனநிலை, அல்சைமர் நோய்கள் போன்றவை தையமின் குறைபாட்டால் வரும். வைட்டமின் B வரிசைகளில் உள்ள B1, B2, B5 போன்ற அனைத்தும் ஆரோக்கியமான உடலுக்கும், ஆரோக்கியமான மனநிலைக்கும் முக்கியத் தேவையானவை ஆகும். முதியவர்களைப் போலவே கர்ப்பிணிப் பெண்களுக்கும் வைட்டமின்களும் மினரல்களும் போதுமான அளவில் கிடைப்பதும் தாய் மற்றும் சேயின் ஆரோக்கியத்தைப் பாதுகாக்கும்.

சக்தி கொடு! - 5 சிவராம் ஜெகதீசன்

ஃபைட்டோ கெமிகல்ஸ் (Phytochemicals) என்கிற பதத்தை எப்போதாவது கேள்விப்பட்டிருக்கிறீர்களா?

மருத்துவ உலகில், நியூட்ரியண்ட் பிரிவில் நடக்கும் தொடரச்சியான ஆய்வுகள், காய்கறிகள் மற்றும் பழங்களை அதிகமாக உண்ணுவது பல உடல் நல பிரச்சினைகளுக்கு நல்ல தீர்வு
கொடுக்கிறது என்று கூறுகின்றன. இதற்குக் காரணம் உணவுப் பொருட்களில் உள்ள ஃபைட்டோ கெமிகல்ஸ்.

ஃபைட்டோகெமிகல்ஸ் என்பவை தாவரங்களால் தயாரிக்கப்படும் ஒரு வேதிப் பொருள். இது காய்கறிகள், பழங்கள், தானியங்கள், பாதாம் போன்ற கொட்டை வகைகள் அனைத்திலும் உள்ளது. இது உடலுக்குப் பெரும்பாலும் நல்லது செய்தாலும், கெட்டதைச் செய்யும் ஃபைட்டோ கெமிகல்களும் உள்ளன. உதாரணமாக கோகெய்ன் கூட ஒரு பைட்டோகெமிகல்தான்.

நல்லது செய்யும் ஃபைட்டோ கெமிகல்களுக்கு உதாரணமாக கரோடினாய்ட்ஸ் (carotenoids), பாலிஃபீனால் (polyphenols), ஃபிளேவனாய்ட்ஸ் (Flavonoids), ஆந்தோசயனைன்ஸ் (Anthocyanins), லிகன்ஸ் (Ligans), ரெஸ்வரேட்ரால் (Resveratrol) எனச் சிலவற்றைச் சொல்லலாம். இம்மாதிரி ஆயிரக்கணக்கில் உள்ளன.

பொதுவாக இந்த ஃபைட்டோகெமிகல்கள் பழங்களிலும், காய்கறிகளிலும், கிழங்குகளிலும் காணப்படும் நிறத்தைக் கொடுப்பவை. பப்பாளிப் பழத்தின் மஞ்சள் நிறத்துக்கும், கேரட்டின் ஆரஞ்சு நிறத்துக்கும், தக்காளியின் சிவப்பு நிறத்துக்கும் கரோடினாய்டுகளே காரணம். நாம் அறிந்த கரோடினாய்ட் பீட்டா கரோடின் (Beta carotine), ஆரஞ்சு, பூசனி போன்றவற்றில் உள்ளது. உடல் இந்த பீட்டா கரோட்டினைத்தான் வைட்டமின் ஏ வாக மாற்றி உபயோகிக்கும்.

இந்த ஃபைட்டோகெமிகல்கள் மிகச் சிறந்த ஆண்ட்டிஆக்சிடண்டுகள். சென்ற பாகத்தில் பார்த்த ஃபிரீ ராடிகல்ஸ்களால், செல்களுக்கு ஏற்படும் பாதிப்பை இவை சரி செய்கின்றன. அதன் மூலமாக இளமையான தோற்றத்தைத் தக்க வைக்கின்றன. உள்காயத்தை ஆற்றுகின்றன. கண்கள், இதயம், கல்லீரல் போன்ற உறுப்புகளுக்கு இவை பாதுகாப்பு அளிக்கின்றன. ரத்த அழுத்தத்தைக் குறைப்பதிலும், நீரிழிவைத் தள்ளிப் போடுவதிலும்,கட்டுப் படுத்திவதிலும், கேன்ஸர் செல்கள் உருவாகாமல் தடுப்பதிலும் இந்த ஃபைட்டோ கெமிக்கல்கள் முக்கியப் பங்காற்றுகின்றன.

உணவில் ஆரோக்கியமான கொழுப்புகளை எடுக்கும் போது இந்த ஃபைட்டோ கெமிகல்களின் பயோஅவைலபிலிட்டி அதிகரிக்கிறது. செயற்கை உரங்கள் போடாத ஆர்கானிக் காய்கறிகளில் இந்த ஃபைட்டோ கெமிகல்களின் செறிவு அதிகமாக இருக்கிறது.

இவை பூண்டு, கிராம்பு, கேரட், திராட்சை, பப்பாளி, தக்காளி, காலிபிளவர், முட்டைக்கோஸ், கத்திரிக்காய், கொத்துமல்லி, கறிவேப்பிலை, ரோஸ்மெரி, ஆலிவ் காய்கள், பாதாம், பிஸ்தா, செர்ரிப் பழங்கள், ஸ்டிராபெர்ரி, புளூபெர்ரி, பிளாக்பெர்ரி, கீரைகள் உட்பட அனைத்துக் காய்கறிகள் பழங்களிலும், டார்க் சாக்கலேட்டிலும் உள்ளன. இவை டிஎன்ஏ மூலக்கூறுகளில் ஏதேனும் பாதிப்பு இருந்தால்கூட அதைச் சரி செய்யும் வல்லமை பெற்றவை.

முக்கியமாக, பளிச்சென்ற நிறங்களை உடைய சிறு பழங்களில் (பெர்ரிகள்) அதிக ஃபைட்டோ கெமிகல்கள் உள்ளன. இவையனைத்தும் நோய் எதிர்ப்புச் செயல்பாட்டில் முக்கியப் பங்காற்றுகின்றன. இவற்றில் உள்ள ஆன்ந்தோசையனின், இதயத்தைப் பாதுகாக்கிறது. மேலும் குடலில் உள்ள நல்லது செய்யும் ப்ரோ-பாக்டிரியாக்களை அதிகரிக்கிறது. அதன் மூலமாக நியூட்ரியண்ட் அப்சார்ப்ஷனை அதிகரிக்கிறது. இந்த நல்லது செய்யும் பாக்டீரியாக்களின் எண்ணிக்கை குண்டாக இருப்பவர்களின் உடலில் குறைந்து கொண்டே போகும்.

சரியான அளவில் சேர்ப்பதன் மூலம் அல்சைமர் போன்ற நோய்களை அண்ட விடாமலே செய்யலாம்.

வைட்டமின்கள் மற்றும் மினரல்களுக்கு ஒரு நாளுக்கு அனுமதிக்கப்பட்ட அளவு (Recommended Daily Allowance - RDA) என்று இருக்கிறது. ஆனால் ஃபைட்டோ கெமிகல்களுக்கு அப்படி அளவு எதுவும் இல்லை. இருந்தாலும் அதிக டோசேஜ்களில் சப்ளிமெண்டுகளாக இவற்றை எடுக்கும் போது உடலில் உள்ள இரும்புச் சத்தைக் குறைப்பதும், தைராய்ட் போன்ற ஹார்மோன்களின் செயல்பாட்டையும் குழப்புகின்றன.

இந்த ஃபைட்டோ கெமிகல்கள் என்பவை அனைத்து நோய்களையும் குணப்படுத்தும் அற்புத சக்தி பெற்றவை அல்ல என்றாலும் தொடர்ச்சியாக ஃபிரெஷ் காய்கறிகளை தினசரி உணவில் சேர்த்துக் கொள்வதன் மூலமாக உடல் நலத்தில் பலவித பலன்களை அடையலாம். இதற்கான சப்ளிமெண்டுகளும் உள்ளன. வைட்டமின்கள் போலவே இவையும் செயற்கையாக தயாரிக்கப் படுகின்றன.

வைட்டமின்கள், மினரல்கள் மற்றும் ஃபைட்டோ கெமிகல்களை உணவுப் பொருட்களின் மூலமாக எடுப்பதே பாதுகாப்பானது என்று பார்த்தோம். பல காரணிகளால் உணவில் உடலுக்குத் தேவையான சத்துகளை எடுக்க முடியாமல் போகும் போது சப்ளிமெண்டுகளின் உதவியை நாடலாம். இப்படி சப்ளிமெண்டுகள் எடுக்கும்போது சிலவற்றை ஞாபகத்தில் வைத்திருக்க வேண்டும்:

* கடுமையான பாதிப்பு : வைட்டமின் மாத்திரைகள் சிலருக்கு கடுமையான பாதிப்புகளை ஏற்படுத்தலாம். இந்த நிலையில் அவற்றை உடனடியாக முழுமையாக நிறுத்தி விட வேண்டும்.

* நீண்ட காலப் பின் விளைவுகள் : சில வகை வைட்டமின் மாத்திரைகள், தலை வலி போன்ற சிறிய உடல் நலக் கோளாறில் ஆரம்பித்து, நீண்ட கால நோக்கில் பெரிய பிரச்சினைகளை ஏற்படுத்தலாம். தொடர்ச்சியாக வைட்டமின் மாத்திரைகளை எடுக்கும் போது இது வரலாம். அதாவது நீங்கள் எடுக்கும் மாத்திரைகளின் நச்சுத்தன்மை உடலில் சிறிது சிறிதாக அதிகமாகும் போது இப்படி ஆகும்.

* முரண்பட்ட மருந்து சேர்க்கைகள் : வைட்டமின் மற்றும் மினரல் சப்ளிமெண்டுகள், ஒன்றுக்கு மேல் ஒரே வேளையில் எடுக்கும் போதோ அல்லது வேறு நோய் தீர்க்கும் மருந்துகளுடன் எடுக்கும் போதோ, ஒன்றுக்கொன்று முரண்பட்டு அதனால் உடல நலத்தில் கெடுதல் உண்டாக்கலாம்.

* பக்க விளைவுகள் : நோயைச் சரி செய்யும் ஆண்ட்டிபயாடிக் மருந்துகளை எடுத்தால் தான் பக்க விளைவுகள் வரும் என்பது இல்லை. வைட்டமின் மாத்திரைகள் எடுத்தாலும் வரலாம். அப்படி ஏதேனும் பக்க விளைவுகள் இருப்பின் மருத்துவரைக் கலந்தாலோசித்துவிட வேண்டும்.

* மறைமுக விளைவுகள் : சில சப்ளிமெண்டுகளை அதிக பட்ச டோசேஜ்களில் எடுக்கும் போது அது வேறு சில நோய் அறிகுறிகளை மறைத்து விடலாம். இதன் காரணமாக உண்மைப் பிரச்சினையைக் கண்டு பிடிக்க முடியாமல் போகலாம். மேலும் ரத்தப் பரிசோதனை அளவுகளில் மாற்றத்தைக் கொடுக்கலாம்.

உங்கள் உடல் நலம் உங்கள் கைகளில். ஏதேனும் சிறு பிரச்சினை என்று தோன்றினாலும் உடனடியாக மருத்துவரை ஆலோசித்துக் கொள்ளவும். எந்த நோய்க்கூறுகளையும், எவ்வளவு விரைவாக கண்டு பிடிக்கிறோமோ அந்த அளவு நல்லது. ஆரம்பத்திலேயே அறிந்து கொள்வதன் மூலம், அதைக் குணப்படுத்துவதன் விகிதத்தை அதிகரிக்க முடியும்.

அதற்காக சிறு சிறு பிரச்சினைகள வரும் போதே எல்லா வைட்டமின்களையும் நிறுத்த வேண்டும் என்பதில்லை. எந்த வைட்டமின்களை எப்படி எடுக்கலாம் என்பதையும் எந்தெந்த வைட்டமின் காம்பினேஷன்களை, எப்படி உடலுக்கு அதிகபட்ச பலன்கள் கிடைக்கும் படியாக எடுக்கலாம் என்பதையும், பல நோய்க்குறிகளுக்கு வைட்டமின் காம்பினேஷன் எப்படி வேலை செய்யும் என்பதையும் பின்வரும் பாகங்களில் விரிவாகப் பார்க்கலாம்.

சக்தி கொடு! - 4 சிவராம் ஜெகதீசன்

ஆரோக்கிய வாழ்வுக்கான வைட்டமின்களும் மினரல்களும்********************************

நாம் உண்ணும் உணவிலிருந்து போதுமான சத்துகள் கிடைப்பதில்லை. அனைத்துக் காய்கறிகளும், பழ வகைகளும், பறிக்கப்பட்டவுடனேயே அதன் சத்துக்களை இழக்கத் துவங்கி விடுகிறது. ஃபிரீஸரில் வைக்கப்படும் போது இன்னும் அதிகமாக சத்துகள் இழப்பு ஏற்படுகிறது. பழங்களும் காய்கறிகளும் கிட்டதட்ட 30 முதல் 50 சதவீதம் வரை குளிரூட்டப்பட்ட நிலையில் சத்துகளை இழக்கின்றன.

உதாரணத்துக்கு, திராட்சைப் பழம் ஃபிரிஜ்ஜில் வைக்கப் படும் போது அது அழுகாமல் வேண்டுமானால் இருக்கும். ஆனால் கடைகளுக்கு வரும் போது அதன் 30 சதவீத வைட்டமின் பி சத்துகளை இழந்திருக்கும். பளபளவென்று கடைகளில் நீங்கள் வாங்கும் ஆரஞ்சுப் பழங்களின் 50 சதவீத வைட்டமின் சி, குளிரூட்டப்படும் முறையால் காணாமல் போய் விடும். அஸ்பராகஸ் எனும் காய், ஒரே வாரத்தில் 90 சதவீதம் வரை வைட்டமின் சியை இழக்கும்.

அதனால் காய்கறிகளை வாரக்கணக்கில் ஃபிரிஜ்ஜில் வைப்பதைத் தவிருங்கள். அன்றன்றைக்கு லோக்கலில் கிடைப்பதை வாங்கி அன்றே சமையலுக்கு உபயோகிப்பதை வழக்கமாக்குங்கள். அதிக பட்ச வெப்பத்தில் சமைப்பதையும் தவிருங்கள். முடிந்த வரை ஆவியில் காய்கறிகளை அதன் நிறம் மாறாமல் வேக வைப்பது, அதிலுள்ள சத்துகளை அதிகபட்சம் உடல் ஏற்றுக் கொள்ளும் நிலையில் உடலில் சேர்க்கும். எண்ணெய்களைச் சேர்த்து அதிக வெப்பத்தில் சமைக்கும் போது, ருசி வேண்டுமானால் சேரலாம், ஆனால் சத்துகளை இழந்து வெறும் சக்கைகளையே உண்பீர்கள்.

இதன் காரணமாகத்தான் வைட்டமின் சப்ளிமெண்டுகளை தற்காலத்தில் அதிகமாக எடுக்கிறோம். டப்பாக்களில் அடைக்கப்பட்டு விற்கப்படும் பழரசங்களையும் முடிந்தவரை தவிர்ப்பது நல்லது. உதாரணத்துக்கு டப்பாவில் அடைக்கப்பட்ட ஆரஞ்சுப் பழ ரசத்தில் உள்ள வைட்டமின் சி, 40 சதவீதம் வரையில் உடலால் உபயோகப் படுத்த முடியாத செயலற்ற நிலையில்தான் இருக்கும். சப்ளிமெண்டுகளிலும் 500mg, 1000 mg என்று லேபிளில் போட்டிருந்தாலும் அதன் பயோஅவைலபிலிட்டி என்பது மிக மிக குறைவாகவே இருக்கும். ஆனால் உடலுக்குத் தொடர்ச்சியாக இந்த சத்துகளானது தேவைப்பட்டுக் கொண்டே இருக்கும்.

சாதாரணமாக உணவில் கிடைக்கும் வைட்டமின்களையும் மினரல்களையும் உடலில் சேர விடாமல் தடுப்பதில் நம் வாழ்க்கை முறையும் பெரும் பங்காற்றுகிறது. ஸ்டிரெஸ் என்று சொல்லப்படும் மன அழுத்தம் பல சத்துகளை உடலில் சேர விடாமல் செய்யும். அதை விட முக்கியமானது ஆல்கஹால். ஆல்கஹால் பழக்கம் நம் உடலில் இருக்கும் அனைத்து வைட்டமின் மற்றும் மினரல் சேமிப்பை மொத்தமாக அழித்து விடும். முக்கியமாக பயோடின், காப்பர், ஜிங்க், மற்றும் வைட்டமின்கள் B1, B6, B12 மற்றும் C.

உண்ணும் உணவை உடைத்து, உடலானது சக்தியைத் தயாரிக்கும் செயலின் போது, அதாவது வளர்சிதை மாற்றத்தின் போது, தயாராகும் இன்னொரு மூலக்கூறு ஃபிரீ ராடிகல்ஸ் (free radicals). இந்த ஃபிரீ ராடிகல் மூலக்கூறுகளில் எலெக்டிரான்கள் இருக்காது அல்லது ஒரு எலெக்டிரான் மட்டுமே இருக்கும். எலெக்டிரான்கள் எப்போதுமே ஜோடியாக இயங்குபவை. அதனால் ஃபிரீ ராடிகல்ஸ் இன்னொரு எலெக்டிரானைத் தேடும். அப்போது உடலில் உள்ள ஆரோக்கியமான செல்களின் எலெக்டிரான்களை இவை திருடிக் கொண்டு அந்த செல்களின் அழிவுக்குக் காரணமாகி விடும். இந்த செயல் முறைக்குப் பெயர் ஆக்சிடேஷன். இந்த ஆக்சிடேஷனால், ஆக்சிடேடிவ் ஸ்டிரெஸ் அல்லது டேமேஜ் ஏற்பட்டு திசுக்களைச் சேதப் படுத்தி, நோய்களுக்கும், விரைவாக வயதான தோற்றம் வருவதற்கும் காரணமாகி விடும். இந்த ஃபிரீ ராடிகல்ஸிடமிருந்து காத்துக் கொள்ளவும் நமக்கு அதிகமான சத்துகள் தேவை.

ஃபிரீ ராடிகல்ஸ் மொத்தமாகவே மோசம் என்று சொல்லி விடவும் முடியாது. உதாரணமாக, கல்லீரல் ஃபிரீ ராடிகல்ஸைத் தயாரித்து சில நச்சுப் பொருட்களை உடலிலிருந்து நீக்கும். ரத்த வெள்ளையணுக்கள் ஃபிரீ ராடிகல்ஸை அனுப்பி பாக்டீரியா, வைரஸ் மற்றும் சேதமுற்ற செல்களை அழிக்கும்.

இந்த ஃபிரீ ராடிகல்ஸ் வெளிக்காரணிகளாலும் ஏற்படும். முக்கியமாக இந்தக் காலகட்டத்தில் வெளிக்காரணிகளின் பங்கு அதிகமாகவே உள்ளது. டெலிவிஷன் திரைகள், கம்ப்யூட்டர் திரைகள், செல்போன்கள், விமானப் பயணங்கள், ஹேர் டிரையர்கள், பளிச்சிடும் லைட் பல்புகள், மைக்ரோவேவ் ஓவன்கள், கெமிக்கல்கள்
கலந்த உணவுப் பொருட்கள் / தண்ணீர் / காற்று, அதிகபட்ச சூரிய ஒளி போன்றவை உடலுக்கு வெளியில் இருந்து கொண்டு உடலுக்குள் நடக்கும் ஃபிரீ ராடிகல்ஸ் தயாரிப்பில் முக்கியப் பங்கு வகிக்கின்றன.

உடல் மேற்சொன்ன காரணிகளுக்கு ஆட்படும்போது, உடலுக்குள் மேலதிக ஆக்சிடேஷன் ஏற்பட்டு, உடலில் ஃபிரீ ராடிகல்ஸ்களின் சுமை அதிகமாகிறது.

அதனால் மேற்கூறியவற்றில் இருந்து முடிந்த வரை உடலைப் பாதுகாக்கவும். இதனால் ஏற்படும் ஆக்சிடேஷன் என்பது, இரும்புச் சாமானில் ஏற்படும் துரு போல. எந்த அளவு உங்கள் உடல் மேற்கூறிய காரணிகளுக்கு எக்ஸ்போஸ் செய்யப்படுகிறதோ அந்த அளவு உடல் மேலும் அதிகமாக துருப் பிடிக்கும். இந்த ஆக்சிடேஷன் செயலை நிறுத்த உங்கள் உடலுக்குத் தேவை ஆண்டி ஆக்சிடண்டுகள். இந்த ஆண்டி ஆக்சிடண்டுகள், ஃபிரீ ராடிகல்ஸ்களுக்குத் தேவையான எலெக்டிரான்களைக் கொடுத்து, செல்களை அழிவிலிருந்து காப்பாற்றுகின்றன.

இந்த ஆண்டி ஆக்சிடண்டுகளையும் மாத்திரைகள் வடிவத்தில் அளவுக்கதிகமாக எடுப்பதும் ஆபத்தே. ஆண்டி ஆக்சிடண்டுகளுக்கு உதாரணமாக வைட்டமின் A, C, E போன்றவைகளையும், செலினியம், கோஎன்சைம் Q10 (CoQ10), ஆல்ஃபா லிப்போயிக் ஆசிட், மெலடோனின் போன்ற சத்துகளைக் கூறலாம்.

பூண்டு ஒரு முக்கியமான ஆண்டி ஆக்சிடண்ட் ஆகும். வயதாக ஆக, உடல் மேற்சொன்ன ஆண்டி ஆக்சிடண்டுகளைக் குறைவாகவே தயாரிக்கும். அதனால் இந்த ஆண்டி ஆக்சிடண்டுகள் உள்ள உணவுகளை - முக்கியமாகப் பழங்களை எடுப்பதன் மூலம் உடலின் ஆண்டி ஆக்சிடண்ட் தேவையைப் பூர்த்தி செய்து வயதான தோற்றம் வருவதைத் தள்ளிப் போடலாம். இதில் மாதுளம் பழமும், பெர்ரிகள் என்று சொல்லப்படும் சிறு பழங்களும், கிரீன் டீயும் முக்கியமானவை.

நாம் தினமும் உணவில் சேர்த்துக் கொள்ளும் கொத்துமல்லித்தழையிலும் ஆண்டி ஆக்சிடண்டுகள் உள்ளன. கொத்துமல்லித் தழையை உணவைத் தயாரித்த பின் கடைசியில் பச்சையாக மேலே தூவி சாப்பிட வேண்டும். நம் ஊரில் கிடைக்கும் நாவல் பழமும் அருமையானதே. தினசரி நாலைந்து நாவல் பழங்களைத் தொடர்சியாக உணவில் சேர்ப்பதும் மிகுந்த பலனைத் தரும்.

சில பேர் தம் வயது 50க்கு மேல் என்பார்கள். ஆனால் 35 வயது போலத் தோற்றமளிப்பார்கள். அதற்கான முக்கியக் காரணம் ஆண்டி ஆக்சிடடுண்டுகள் அதிகம் உள்ள உணவுகளை அவர்கள் உண்பதே. இப்படி உணவுப் பொருட்களில் உள்ள ஆண்டி ஆக்சிடண்ட் அளவுகளை அளக்க ORAC Score (Oxygen Radical Absorption Capacity) என்ற அளவு முறையைப் பயன் படுத்துகிறார்கள். 100 கிராம் உணவுப் பொருளில் எவ்வளவு ORAC இருக்கிறது என்ற அளவே இது.

இளமை தங்கவேண்டுமானால் உணவில் ஆண்ட்டி ஆக்சிடண்டுகள் அவசியம்.

சக்தி கொடு! - 3 - சிவராம் ஜெகதீசன்

ஆரோக்கிய வாழ்வுக்கான வைட்டமின்களும் மினரல்களும்
********************************

பயோஅவைலபிலிடி.

நாம் உணவில் எடுக்கும் வைட்டமின்களும் மினரல்களும் எந்த அளவு உடலால் உறிஞ்சப்பட்டு உபயோகிக்கப்படும் என்பதைப் புரிந்து கொள்ள, இந்த பயோஅவைலபிலிட்டியை அறிவது அவசியம்.

இந்த பயோஅவைலபிலிடி என்பது, உண்ணும் உணவு, எடுக்கும் வைட்டமின்கள் & மினரல் சப்ளிமெண்டுகள், மருந்து வகைகள் என்று அனைத்துக்கும் பொருந்தும். ஏதாவது உணவையோ அல்லது பானங்களையோ எடுக்கும்போது அதிலுள்ள நியூட்ரியண்டுகள் ரத்த ஓட்டத்தில் உறிஞ்சப்பட்டு, அதன் வழியே கொண்டு செல்லப்பட்டு திசுக்களைச் சென்று அடைகின்றன.

ஒவ்வொரு உணவுக்கும் இந்த பயோஅவைலபிலிடியைக் கணக்கிட கடினமான சமன்பாடுகள் உண்டு. இப்போதைக்கு, உண்ணப்படும் உணவானது உடலால் உறிஞ்சப்படும் அளவை பயோஅவைலபிலிடி என்று எளிமையாகப் புரிந்துகொள்ளலாம். உணவு ஜீரனமாதலின் வளர்சிதை மாற்ற வழித்தடத்தில் உணவின் சத்துகள் உடலால் உறிஞ்சப்படுகின்றன. இது வாயில் இருந்து வயிறு, குடல் போன்ற அனைத்துப் பகுதிகளிலும் நடக்கிறது.

இந்த சத்துகள் உடலால் உறிஞ்சப்படும் அளவு என்பது பல வகையான வெளி மற்றும் உட்காரணிகளால் பாதிக்கப்படுகிறது. எடுக்கும் உணவின் தரம் (ரெடிமேட் உணவா, பல நாட்கள் கடைகளில் இருந்த உணவா போன்றவை), எதையெல்லாம் சேர்த்து உண்ணுகிறோம், உண்பவரின் வயது, பாலினம் போன்ற பல காரணிகள் இந்த பயோஅவைலபிலிட்டியைத் தீர்மானிகின்றன. மேக்ரோ நியூட்ரியண்ட்ஸ் என்று சொல்லப்படும் மாவு, புரதம் மற்றும் கொழுப்புச் சத்துகளின் பயோஅவைலபிலிடி அதிகமாக இருக்கும். ஆனால் மைக்ரோ நியூட்ரியண்ட்ஸ் எனப்படும் வைட்டமின்கள் மற்றும் மினரல்களில் பயோஅவைலபிலிட்டி குறைவாகவே இருக்கும்.

உணவில் உள்ள சத்துகளை உடல் உறிஞ்ச முதல் படி நிலை, உணவிலிருந்து அந்த சத்துக்களை விடுவித்து, வேறொரு வடிவத்துக்கு மாற்றி, குடலால் கிரகிக்கப் படுவதற்கு ஏதுவாக மாற்றுவதே. இந்த செயல்பாடு, உணவை மென்று சாப்பிடுவதில் ஆரம்பிக்கிறது. உமிழ்நீருடன் கலந்து உள்ளே செல்லும் போது பலவித என்சைம்கள் மற்றும் வயிற்றிலிருக்கும் அமிலங்களுடன் கலந்து சிறுகுடலுக்குச் செல்கிறது. சிறுகுடலில் பல என்சைம்களுடன் கலந்து உணவு முற்றிலுமாக உடைக்கப்பட்டு, பெரும்பாலான சத்துகள் உடலால் உறிஞ்சப்படுகிறது. இத்துடன் சமைத்தலும் உணவை உடைக்க முக்கியப் பங்காற்றுகிறது.

பல சத்துகள் உடலுக்குத் தேவையான வடிவத்தில் (chemical form) இல்லாமல் வேறு வடிவங்களில் உள்ளது.

உதாரணமாக இரும்புச் சத்து. ஹீம் அயர்ன் மற்றும் நான் ஹீம் அயர்ன் என்று இரு வகை அயர்ன்கள் உள்ளன. இறைச்சிகளில் உள்ள ஹீம் அயர்ன் உணவிலிருந்து விடுவிக்கப்பட்டவுடனேயே, மைய இரும்பு அனுவைச் சுற்றி ஒரு ஹீம் மூலக்கூறாலான பாதுகாப்பு வளையத்தை அமைக்கிறது. இந்த வளையம் மற்ற சத்துகளால் தொடர்பு கொள்ள முடியாமல் ஒரு பாதுகாப்பு கேடயமாக செயல்படுகிறது. இதனால் குடல் செல்களால் நேரடியாக உறிஞ்சப்படுகிறது. தாவரங்களில் இருக்கும் நான் ஹீம் அயர்னில் இந்த அமைப்பு இல்லாததால் வேறு சத்துகளுடன் கலந்து மிகக் குறைவான அளவே குடல் செல்களால் உறிஞ்சப் படுகிறது.

உணவு கம்பெனிகள் சில வித உணவுகளில் வைட்டமின்களைக் கலக்கும். இதனை ஃபோர்டிஃபை செய்வது என்று சொல்வார்கள். உதாரணத்துக்கு வைட்டமின் டி ஏற்றப்பட்ட சமையல் எண்ணெய். இது போல ஃபோர்டிஃபை செய்யப்பட்ட வைட்டமின்கள் கிட்டத்தட்ட 20சதம் முதல் 70 சதம் வரையே பயோஅவைலபிலிட்டியைக் கொண்டிருக்கும். ஆனால், அதிக சதவீத பயோஅவைலபிலிட்டி உள்ள உணவுப் பொருட்கள் உடலுக்கு நல்லது.

இந்த பயோஅவைலபிலிட்டியை மேம்படுத்தும் காரணிகளும் உள்ளன. சத்துகள் ஒன்றுக்கொன்று தொடர்பு கொள்ளும் போது ஒரு சத்தின் கிரகிப்புத்திறன் அதிகரிக்கும் அல்லது இரண்டு சத்துகளுமே ஏற்கப்படாது. உதாரணத்துக்கு வைட்டமின் சியோடு சேர்த்து எடுக்கப்படும் இரும்புச் சத்து இரண்டிலிருந்து மூன்று மடங்கு வரை அதிகரிக்கிறது. இது போல உதவி செய்பவற்றை ஹெல்பர்ஸ் என்று சொல்லலாம்.

இன்னொரு பக்கம் சில சத்துகள் மற்ற சத்துகளை உடல் ஏற்க விடாது. இவற்றை இன்ஹிபிட்டர்ஸ் என்று சொல்லலாம். இவை முக்கிய உயிர்ச்சத்துடன் ஒட்டிக் கொண்டு குடல் செல்களால் ஏற்கப்படாத படிவத்தை அடைந்து விடும். இப்படிச் செய்து அந்த சத்துகளை உடல் உறிஞ்ச விடாமல் செய்து அவற்றை வெளித்தள்ளி விடும். அல்லது இந்த இன்ஹிபிட்டர்ஸ் போட்டி போட்டுக் கொண்டு உண்மையான சத்தை உடல் ஏற்க விடாமல் செய்யும். இந்த இன்ஹிபிட்டர்களில் முக்கியமானது ஃபைட்டிக் ஆசிட். இந்த பைட்டிக் ஆசிட், பாதாம் போன்ற கொட்டை வகைகளிலும் அனைத்து தானியங்களிலும் உள்ளது.

இதனால்தான் பாதாமை ஊற வைக்காமல் உண்ணக்கூடாது. ஊற வைப்பதும், நெய்யில் வறுப்பதும் பாதாமில் உள்ள ஃபைட்டிக் ஆசிட்டை பெரும்பாலான அளவு நீக்கி விடும். இந்த ஃபைட்டிக் ஆசிட், உணவில் இருக்கும் இரும்பு, கால்சியம், ஜிங்க் போன்ற தாதுக்களை உடல் உறிஞ்ச விடாது. இன்னொரு உதாரணம், கால்சியமும் நான் ஹீம் அயனும் ஒன்றாகச் சேர்த்து எடுக்கும் போது, கால்சியம் அயர்ன் உறிஞ்சப்படுவதைத் தடுக்கும். அதனால் கால்சியம் மாத்திரையையும் அயர்ன் மாத்திரையையும் ஒன்றாக எடுக்கக் கூடாது.

இன்னொரு உதாரணம் பார்ப்போம். வைட்டமின் பி12, வயிற்றிலிருக்கும் அமிலங்களால் பிரிக்கப்பட்டு வேறொரு ப்ரொட்டீனுடன் (R - protein) சேர்க்கப்பட்டு மேலும் மாற்றமடைந்து உடலால் கிரகிக்கப் படுகிறது. ஆண்டாசிட்கள் (antacid) எனப்படும் ஜெலுசில் போன்றவற்றை எடுக்கும் போது அத்துடன் பி12 எடுத்தால் அந்த பி12 உடலால் கிரகிக்கப்படாது. தொடர்ச்சியாக ஆண்டாசிட்கள் எடுக்கும் போது பி12 குறைபாடு வருவதற்கான சாத்தியங்கள் அதிகம்.

இவை ஆரம்ப நிலை உதாரனங்கள் மட்டுமே. இனி வரும் அத்தியாயங்களில் ஒன்றுக்கொன்று எதிராக செயல்படும் சத்துகளையும், ஒன்றுக்கொன்று உதவி செய்யும் ஹெல்பர்ஸ் பற்றியும் விளக்கமாகப் பார்க்கலாம்.

சக்தி கொடு! - 2 , சிவராம் ஜெகதீசன்

ஆரோக்கிய வாழ்வுக்கான வைட்டமின்களும் மினரல்களும் 

********************************

வைட்டமின்கள் & மினரல்கள் என்றால் என்ன?

வைட்டமின், மினரல், ஃபைட்டோ கெமிகல்ஸ், ஆண்ட்டி ஆக்சிடண்ட்ஸ் - இவையெல்லாம் என்ன?

வைட்டமின்கள் என்பவை இயற்கை மூலக்கூறுகள். இவற்றை நம் உடல் தானே தயாரிக்காது. அல்லது மிகுந்த சிரமப்பட்டு ஏதோ கொஞ்சம் தயாரிக்கலாம். சூரிய ஒளியில் இருந்து டி வைட்டமின் தயாரித்துக்கொள்வது போல. ஆனால் வைட்டமின்கள் நமக்கு மிகவும் அவசியம். எனவே, நாம் உண்ணும் உணவிலிருந்துதான் பெரும்பாலான வைட்டமின்கள் உடலுக்குக் கிடைக்கவேண்டும்.

நாம எதைச் சாப்பிடுகிறோம்? தாவரங்கள், மற்றும் இறைச்சிகள். மனிதர்களுக்கிஉ இரையாகும் விலம்க்குகளும் தாவரத்தை உண்பவை தான். அதனால், பொதுவாகத் தாவரங்கள்தாம் இந்த வைட்டமின்கள் கிடைப்பதற்கு ஒரே வழி. அந்தத் தாவரங்கள் எப்படி இந்த வைட்டமின்களைப் பெறுகின்றன? என்றால், மண்ணிலிருந்து.

அதாவது இயற்கையாக மண்ணில் விளைகிறது தாவரம்; அதை உண்ணும் விலங்குகளுக்கு இந்த வைட்டமின்களும் மினரல்களும் கிடைகின்றன. மண்ணிலிருந்து சத்துகளை உறிஞ்சி அதைத் தேவைக்கேற்ப மாற்றி தாவரங்கள் அவற்றைத் தன்னகத்தே வைத்திருக்கும். இதை உண்பதன் மூலம் மனிதர்களுக்கும் விலங்குகளுக்கும் தேவையான வைட்டமின்களும் மினரல்களும் கிடைக்கின்றன. மலையில் இருந்தும் மழையில் இருந்தும் ஆறு கிளம்பி, அதை அணைகள் தேக்கி, பைப்புகள் வழியே மெட்ரோ வாட்டர் நம் வீட்டுக்கு அனுப்புகிறதல்லவா? அந்த மாதிரி.

பிரச்னை என்னவென்றால், இப்படித் தொடர்ச்சியாக விளைவிக்கப்பட்ட நிலங்கள் அதன் சத்துகளைக் கிட்டத்தட்ட இன்று இழந்தே விட்டது. இந்த நிலங்களில் போடப்படும் உரங்கள் பயிர்களை அதிகமாக வளர்க்க உதவி செய்தாலும், தேவையான அல்லது ஒரு நூற்றாண்டுக்கு முன் இருந்ததைப் போல சத்தான நிலங்கள் இப்போது நம்மிடம் இல்லை. மண்ணிலிருக்கும் நுண்ணுயிரிகளை உரங்கள் பெரும்பாலும் அழித்து விட்டன. உலகில் மிகச் சில விவசாய நிலங்களைத் தவிர பெரும்பாலான விவசாய நிலங்களின் நிலை இதுதான். மேலும் தற்போதைய ஆராய்ச்சிகளில் மரபணு மாற்றம் செய்யப்பட்ட காய்கறிகளும் உணவுப் பழக்கத்துக்கு வந்து விட்டன. இப்போதே தேவையான நோய்களை வைத்திருக்கிறோம். இன்னும் இந்த நிலை மோசமாக ஆகும்போது நோய்களின் எண்ணிக்கையும் அதிகமாகும்.

இன்னொரு பிரச்னையும் உள்ளது. இப்போது கிடைத்துக் கொண்டிருக்கும் உணவுகளையும் பதப்படுத்துதல் என்ற பெயரில் ருசிக்காகவும், அதிக நாட்கள் டிபார்ட்மெண்ட் ஸ்டோர்களின் அலமாரிகளில் கெடாமல் இருக்கச் செய்வதற்காக இன்னும் அவற்றின் சத்துகள் முற்றிலுமாக உறிஞ்சப்பட்டு, வேறு செயற்கையான ரசாயனங்கள் சேர்க்கப்பட்டு, அழகாக பேக் செய்து விற்கப் படுகிறது.

அதனால்தான் பேலியோவில் இயற்கையாகக் கிடைப்பதை மட்டும் (சிறிது சத்துக் குறைபாட்டுடன் இருந்தாலும்) வீட்டில் சமைத்து உண்ணச் சொல்கிறோம். பொரிப்பதையும், ரெடிமேட் உணவுகளையும் வேண்டாம் என்று சொல்கிறோம்.

நாம் உண்ணும் உணவிலிருந்து தேவையான சத்துகளைக் கிரகிக்க முடியாமல் உடல் திணறுகிறது. இன்னும் உணவு வேண்டும் வேண்டும் என்று கேட்கிறது. எதிலிருந்தாவது உடல் தனக்குத் தேவையான சத்துகள் கிடைக்காதா என்று தேடுகிறது. இந்த சத்துகள் உடலுக்கு வேண்டும் என்பது அனைவருக்கும் தெரிந்த விஷயமே.

உணவுகளில் ஏற்பட்ட இந்த உயிர்ச்சத்துகள் பற்றாக் குறையின் காரணமாக மருத்துவ அறிவியல் எந்தக் குறிப்பிட்ட சத்து உடலுக்குத் தேவையான சக்தியை அளிக்கிறது என்று கண்டு பிடித்து அவற்றை கெமிக்கல்கள் மூலம் கட்டமைத்து, இயற்கையைப் போலவே தோற்றமளிக்கும் செயற்கைப் பிரதிகளை உருவாக்க ஆரம்பித்தது.

தற்போது கடைகளில் கிடைக்கும் காய்கறிகள், லட்சக்கணக்கான ஆண்டுகளாக உண்ணப்பட்டு வந்த காய்கறிளின் வடிவங்களே அல்ல. மலடாகிப் போன மண்ணிலிருந்து விளைவிக்கப்படும் காய்கறிகளில் உடலுக்குத் தேவையான சத்துகள் முழுமையாகக் கிடைக்காது. இதன் காரணமாகத்தான் பல வகையான ஆட்டோ இம்யூன் நோய்களும், மெடபாலிக் சிண்ட்ரோம் என்று சொல்லப்படும் வளர்சிதை மாற்ற நோய்களும், உடல் பருமனும் அலர்ஜி எனப்படும் ஒவ்வாமை நோய்களும் நமக்கு வருகின்றன.

ஆய்வகங்களில் தயாரிக்கப்பட்ட இந்த செயற்கை வைட்டமின்களை மல்ட்டி வைட்டமின்கள் என்ற பெயரிலும், உணவிலேயே சேர்த்தும் (வைட்டமின் டி செறிவூட்டப்பட்ட எண்ணெய், பால், வைட்டமின்களும் மினரல்களும் உள்ள குளிர் பானங்கள் போன்றவை இந்தப் பிரிவில் வருபவை) நம்மிடம் விற்க ஆரம்பித்தார்கள். கிட்டத்தட்ட அனைத்து வகையான மல்ட்டி வைட்டமின்களும் சிந்தெடிக் என்று சொல்லப்படும் செயற்கை வைட்டமின்களே. அதற்காக இந்த செயற்கை வைட்டமின்கள் முழுக்க முழுக்கப் பயனற்றவை என்று சொல்லி விடவும் முடியாது. இந்த செயற்கை வைட்டமின்களைத் தயாரிப்பது சுலபம், விலையும் மலிவு. அதிக நாட்கள் பாட்டிலில் வைத்தாலும் அதன் தன்மை மாறாது, அதாவது கெட்டுப் போகாது. பெரிய அளவான டோசேஜ்களை சின்ன மாத்திரைக்குள் அடக்கி விட முடியும். இந்த செயற்கை வைட்டமின்களையும் "இயற்கை" என்றே சொல்லி விற்க அனுமதிக்கப்பட்டு இருக்கிறது.

ஏனெனில் இந்த செயற்கை வைட்டமின்களின் மூலக்கூறுகளும் இயற்கை வைட்டமினின் மூலக்கூறுகளும் ஒன்றே. ஆனால் இயற்கையில் - உணவில் கிடைக்கும் வைட்டமின்களுக்கும் செயற்கைக்கும் உள்ள முக்கியமான வேறுபாடு, செயற்கை என்பது தனியாகக் குறிப்பிட்ட வைட்டமினை மட்டுமே கொண்டிருக்கும். இயற்கையில் கிடைக்கும் என்சைம்களும், கோ ஃபேக்டர்களும் செயற்கையில் கிடைக்காது. இந்த கோ ஃபேக்டர்கள் தான் உடலால் இந்த சத்துகள் கிரகிக்கப்படுவதற்கு மிக மிக மிக முக்கியமானது.

இந்த செயற்கை வைட்டமின்கள் தயாரிக்கப்படும் முறைக்கும் இயற்கையாக தாவரங்களோ அல்லது விலங்குகளோ, வளர்சிதை மாற்றத்தினால் தயாரிக்கும் முறைக்கும் அளவு கடந்த வேறுபாடு உள்ளது.

ஆய்வகத்தில் தயாரிக்கப்பட்ட இந்த செயற்கை வைட்டமின்கள், உடலால் கிரகிக்கப்படும் அளவு மிக மிகக் குறைவு. உடல் எதிர்பார்ப்பது இந்த செயற்கை வைட்டமினை அல்ல. பெரும்பாலாலான நேரத்தில் உடலுக்கு இந்த செயற்கை வைட்டமினை வைத்துக் கொண்டு என்ன செய்வது என்று தெரியாது விழிக்கும் அல்லது கழிவு என்று வெளியே தள்ளி விடும்.

அதனால், மெகா டோஸ்களில் வைட்டமின்களையும் மினரல்களையும் எடுத்தால் எல்லா வியாதியும் சரியாகிவிடும் என்று நினைக்க வேண்டாம். இதற்கான டோசேஜை மருத்துவரிடம் ஆலோசித்து எடுப்பதே பாதுகாப்பானதாகும்.

உண்ணப்படும் உணவிலிருந்தோ அல்லது எடுக்கும் சப்ளிமெண்டுகளில் இருந்தோ, ஒரு வைட்டமின் எந்த அளவு உடலால் கிரகிக்கப்படுகிறது, உபயோகமாகிறது என்பது முக்கியம்.

இதை பயோஅவைலபிலிடி என்று சொல்வார்கள்.

சிவராம் ஜெகதீசன் சக்தி கொடு! - 1

சக்தி கொடு! - 1
ஆரோக்கிய வாழ்வுக்கான வைட்டமின்களும் மினரல்களும் 
ஒரு விரிவான அறிமுகம்.


[பொறுப்புத் துறப்பு : நான் மெடிகல் பிராக்டிஷனர் - மருத்துவர் அல்ல. இந்தத் தொடரின் மூலம் சொல்லப்படும் விஷயங்களை நீங்களாக முயற்சிப்பதோ அல்லது தக்க மருத்துவர் ஆலொசனையின்றி முயற்சி செய்து பார்ப்பதோ தவறு என்பதுடன், அதற்காகவோ அதன் விளைவுகளுக்காகவோ நானோ இந்தக் குழுமமோ எவ்வகையிலும் பொறுப்பாக மாட்டோம் என்று கூறி என் பொறுப்பைத் துறக்கிறேன்]


********************************

வணக்கம் நண்பர்களே,

மேக்ரோ நியூடிரியண்ட்ஸ் என்றால் என்னவென்று நமக்குத் தெரியும். மாவு - புரதம் - கொழுப்புச் சத்துகளை அக்கு வேறு ஆணி வேறாக அலசி, அதன் அடிப்படையில் ஆரோக்கிய வாழ்வுக்கான பேலியோ உணவு முறையை செல்வன் ஜி அவர்கள் நமக்கு அறிமுகப்படுத்தியிருக்கிறார். எடைக்குறைப்பு முதல் எத்தனையோ நோய்களில் இருந்து நாம் விடுதலையடைந்தும் இருக்கிறோம்.

அடிப்படையில் இந்த மேக்ரோ நியுட்ரியண்டுகள் உடலின் கட்டுமானத்துக்கு உதவி செய்பவை; இயக்க சக்திக்கான கலோரிகளைத் தருபவை. இவை அல்லாமல் ஆரோக்கியமான உடலுக்குத் தேவையான மைக்ரோ நீயூட்ரியண்டுகள் எனப்படும் நுன்ணளவு ஊட்டச் சத்துகள் பற்றியும் நாம் அறிந்துகொள்ள வேண்டியது அவசியம்.

உடல் ஆரோக்கியத்துக்கு அவசியமான உயிர்ச்சத்துக்கள் என்று சொல்லப்படும் வைட்டமின்கள், தாது உப்புகள் என்று சொல்லப்படும் மினரல்கள், ஃபைட்டோ கெமிகல்ஸ், ஹார்மோன்கள் மற்றும் ஆண்டி ஆக்சிடண்டுகள் அனைத்தைக் குறித்தும் இதில் நாம் விளக்கமாகப் பேசலாம்.

காய்கறிக் கடைகளில் சாதாரனமாகக் கிடைக்கும் எலுமிச்சம் பழத்தில் உள்ள வைட்டமின் சி முதல், அரிதாகக் கிடைக்கும், புற்று நோயைக் கட்டுப்படுத்தி குணமாக்கும் வைட்டமின் பி17 (B17) வரை பேச எவ்வளவோ இருக்கிறது.

எதற்குப் பேசவேண்டும்? நம் உடலைப் பற்றி நாம் அக்கறை கொள்ளாவிட்டால் வேறு யார் அதைச் செய்வார்கள்?

ஒவ்வொரு வைட்டமினும் எந்த உணவுப் பொருளில் உள்ளது, உடலுக்கான அவற்றின் தினசரித் தேவை என்ன, எந்த வைட்டமினை எப்படி எடுத்தால் அது உடலால் முழுமையாக கிரகிக்கப் படும் என்பது பற்றியெல்லாம் விரிவாகப் பார்க்கப் போகிறோம். இந்த வைட்டமின்களும் மினரல்களும் எவ்வாறு ஆய்வகத்தில் செயற்கையாகக் கட்டமைக்கப் பட்டு சந்தைப் படுத்தப் படுகிறது போன்றவற்றையும் சேர்த்தேதான் பார்க்கவிருக்கிறோம்.

இந்த மைக்ரோ நியூடிரியண்டுகள், மேக்ரோ நியூடிரியண்டுகளுடனும், என்சைம்களுடனும், கோஃபேக்டர் என்று சொல்லப்படும் உப காரணிகளுடனும் சேர்ந்து செயல் பட்டு உடலையும், மனதையும் ஆரோக்கியமாக வைக்கிறது. ஒவ்வொரு வைட்டமின், மினரல் குறைபாட்டால் வரும் உடல் ரீதியான பிரச்சினைகள், அவற்றைச் சரி செய்யும் விதங்கள் பற்றியும் இந்தத் தொடரில் எழுதப் போகிறேன்.

இரண்டு மாதங்களுக்கு முன் ஒரு நாள் நண்பரின் மனைவியிடமிருந்து போன்.

'அண்ணா, பொன்னு அடிக்கடி மயங்கி விழுந்துடறா, என்னன்னே தெரியல. உங்க கிட்ட பேசலாம்னு போன் செஞ்சேன்.'

'டாக்டர்ட்ட போனியா, என்ன சொன்னார் டாக்டர்?'

'போனேன்ணா. அயர்ன் குறைவா இருக்குன்னு ஆறு மாசமா அயரன் டேப்லட் எடுத்துட்டுருக்கா'

'சரி, லேடஸ்ட் பிளட் டெஸ்ட் ரிப்போர்ட்ட எனக்கு வாட்சப்ல அனுப்பு'

ரிப்போர்ட் வந்தது. ஹீமோகுளோபின் 5.8. ஆறு மாசமா அயர்ன் டேப்லட் எடுத்தும் 5.8.

'நீ ஒன்னு செய். ஈரல், சுவரொட்டி, ரத்தப் பொரியல், இதுகள்ல ஏதாவது ஒன்னையோ அல்லது கலந்தோ தினமும் 150 கிராம் அவளுக்குக் கொடு. கூடவே உப்பு போட்டு எலுமிச்சம்பழ ஜூஸ் தினசரி கொடு’'

'சரிண்ணா, இன்னிகே ஆரம்பிக்கறேன்'

ஒரு மாதம் கழித்து 'அண்ணா, இப்ப அந்தப் பிரச்சினையே இல்ல, மயங்கி விழற பிரச்சினை எங்க போச்சுன்னே தெரியல. ஈரல் செம வொர்க் அவுட் ஆயிடுச்சுண்ணா.'

என்ன நடக்கிறது என்று புரிகிறதா? இரும்புச் சத்தை அதன் இயற்கையான வடிவத்தில் எடுக்க வேண்டும். லட்சக்கணக்கான வருடங்களாக உடலுக்கு அதுதான் தெரியும். திடீரென்று அயர்ன் என்று ஒன்றைப் பிரித்தெடுத்து அல்லது ஆய்வகத்தில கெமிகல்கள் மூலம் தயாரித்து விழுங்கினால் அதை உடல் எப்படி ஏற்கும்?

சிக்கல் இதுதான். பெரும் பிரச்னையும் இதுவேதான். இது எப்படி நிகழ்கிறது, ஏன் நிகழ்கிறது என்பதை ஒவ்வொரு வைட்டமினுக்கும் மினரலுக்கும் விரிவாக இந்தத் தொடரில் பார்க்கப் போகிறோம்.

சத்தத்தினுள்ளே சதாசிவங்காட்டி சித்தத்தினுள்ளே சிவலிங்கம் காட்டியதைப் போல ஒவ்வொரு உணவிலும் மறைந்திருக்கும் உயிர்ச்சத்துகளைப் பார்க்கப் போகிறோம்.

"உள்ளம் பெருங்கோவில், ஊனுடம்பு ஆலயம்" என்று சித்தர் திருமூலர் திருமந்திரத்தில் சொல்லியிருக்கிறார். உடல் பராமரிப்பை, கோவிலைப் பராமரிப்பது போலப் பராமரித்து அதை ஆரோக்கியத்துடன் வாழச் செய்ய உதவும் அனைத்து உபாயங்களையும் இந்தத் தொடர் சொல்லப் போகிறது.

போலவே, அளவுக்கதிகமாக இந்த வைட்டமின்களும் மினரல்களும் எடுத்தால் என்னென்ன பிரச்சினைகள் வரும் என்பதையும் பார்க்கப் போகிறோம். பொதுவாக இந்த வைட்டமின்களும் மினரல்களும் உள்ள உணவை எடுப்பதால், அளவுக்கதிகமாக உடலில் சேராது. கடைகளில் கிடைக்கும் மாத்திரைகளை வாங்கி உட்கொள்வதன் மூலமே இந்த "ஓவர் டோஸ்" என்று சொல்லும் வகையில் அளவுக்கதிகமாக ஆகிறது. வைட்டமின் குறைபாட்டால் பிரச்சினைகள் வருவது போலவே ஓவர் டோஸாலும் பிரச்சினைகள் வரும். கூடவே எந்த வகையான மருந்துகள் மற்றும் மாத்திரைகள், எந்த விதமான வைட்டமின்களையும் மினரல்களையும் உடம்பிலிருந்து அழித்து பல பிரச்சினைகளுக்குக் காரணமாகிறது என்பதையும் அலசப் போகிறோம். அத்துடன் பல வகையான வியாதிகளுக்கு பலனளிக்கும் வைட்டமின்களைப் பற்றியும் பார்க்கப் போகிறோம்.

திருமூலரின் இன்னொரு பாடலை உதாரணம் காட்டி இந்த அறிமுகப் பகுதியை முடித்துக் கொள்கிறேன்.

"உடம்பால் அழியின் உயிரால் அழிவர்
திடம்பட மெய்ஞ்ஞானம் சேரவும் மாட்டார்
உடம்பை வளர்க்கும் உபாயம் அறிந்தே
உடம்பை வளர்த்தேன் உயிர் வளர்த்தேனே"

Homocysteine-இது அதிகம் இருந்தால் மாரடைப்பு வரலாம்.

Homocysteine-இது அதிகம் இருந்தால் மாரடைப்பு வரலாம்.

யாருக்கு அதிகமாகிறது?
1. வயது ஏற ஏற இது அதிகரிக்கலாம்.
2. பெண்களை விட ஆண்களுக்கு இது அதிகமாக இருக்கும்.
3. புகை பிடித்தால் இது அதிகமாகும்.
4. அதிகம் காபி சாப்பிட்டாலும் இது அதிகமாகலாம்.
5. பிரஷர் அதிகம் இருந்தாலும் இது அதிகமாகலாம்.
6. கொலஸ்டிரால் பிரச்சினை இருந்தாலும் இது அதிகரிக்கும்.
7. கிட்னி பிரச்சினை இருந்தாலும் அதிகரிக்கலாம்.

8. முக்கியமாக B12, B6, folic acid விட்டமின்கள் கம்மியாக இருப்பதாலேயே இது அதிகம் காணப்படுகிறது

அதனால் ஹோமோ சிஸ்டின் அதிகம் இருந்தால் பேலியோ டயட் நல்ல பலனளிக்கும்.

உங்களுக்கு ஹோமோசிஸ்டின் அதிகம் இருந்தால் செய்ய வேண்டியது:
1.பிரஷர் செக் செய்யவும். அதை மருந்துகள் மற்றும் பேலியோ மூலம் சரி செய்யவும் (blood pressure file பார்க்கவும்-files sectionல்)
2. 30-40அளவுகள் இருந்தால், பேலியோ டயட் மட்டுமே போதும். அதற்கு மேல் இருந்தால் பேலியோ டயட்டுடன் Tablet. Homocheck காலை உணவிற்கு பின் ஒரு மாத்திரை எடுக்கலாம். இரண்டு முதல் மூன்று மாதங்களுக்கு. இதில் B12, B6, folate விட்டமின்கள் உள்ளன. (B12 அளவுகள் நார்மலாக இருந்தாலும் இந்த மாத்திரை எடுக்கலாம்). 65க்கு மேல் இருந்தால் இருதய டாக்டரை பார்த்தல் நலம்.

3. காபி, புகையை விட்டு விடவும்.

4. creatinine அளவுகள் நார்மலாக இருந்தால் பிரச்சினை இல்லை. அதிகம் என்றால் nephrologistஐ பார்க்கவும். மற்றும் கிட்னி பெயிலியர் பேலியோ டயட் பாலோ செய்யவும்

5. டயட்டில் இருக்கும் அனைவரும் மூன்று மாதங்களுக்கு ஒரு முறை பேலியோ டெஸ்டுகள் எடுக்க வேண்டும்.

மேலே உள்ளது போல் செய்தும் மூன்று மாதங்களில் homocysteine குறையவில்லை என்றால் இருதய டாக்டரைப் பார்த்து டிரட்மில் டெஸ்ட் எடுக்கவும்.

B12 அதிகம் உள்ள உணவுகள்-ஈரல், பால், தயிர், சீஸ், நான் வெஜ், முட்டை
Folic acid- கீரை, புரோக்கோலி, அவகேடோ, எலுமிச்சை
B6- மீன், பிஸ்தா, மிளகு பொடி, நான்வெஜ், கீரை